菇菇米芝蓮 ♣ 中村藤吉 綠茶店

有一日晏晝三點幾係尖沙咀就完成工作需要搵個地方坐低 做埋剩餘的工作

所以我就開始要上網搵餐廳

實在唔想再去Starbucks喇

行過TheOne就諗起一直以來都好想去既 [中村藤吉]

所以我就上去18樓碰碰運氣

平日下晝三點幾 估唔到都有人排隊喎

可能因為我只得一個人 

所以就比較容易有位

等等等等等咗大概20分鐘就有位啦

等位期間佢哋會提你有得試食

今日試食係 焙茶朱古力同埋中村茶

焙茶朱古力 食入口好濃朱古力味

慢慢之後先有深深的焙茶味滲出來

中村茶入口微微帶酸

師傅話係有六種綠茶茶葉調配出來的

入餐廳後 侍應會送來一壺熱茶

入口味道同中村茶唔一樣

我認為呢款比較好飲

我坐坐下自己一個人都飲哂成壺(笑)

甜品嘅份量都算大 

所以我一個人應該食唔晒

我就揀咗最普通嘅生茶啫哩

金屬碗入面就係一個小拼盤

有雪糕有啫哩有白玉有紅豆蓉

一個人來都食到咁多款食物

感覺好抵丫

:::::食後感:::::

💋 雪糕茶味唔夠 奶味比較重 偏甜

💋 啫哩焙茶味濃 唔甜 幾好味

💋 白玉普普通通 

💋 紅豆蓉配白玉配啫哩 味道唔錯

餐廳入面仲有紀念品店

可以買佢哋嘅餐墊 茶葉 甚至係杯

其實今日發生左件小插曲

我入左餐廳先發現自己只有$108現金

仲要無帶信用卡 

我計來計去最平價的甜點就要$88

openrice仲話要收$10茶芥

最後$98 僅僅夠錢埋單

菇菇米芝蓮 ♣ Wired cafe

因為工作的關係

我今日終於可以離開灣仔

過大海去尖沙咀食lunch啦

工作地點係TheMira

所以我就近近地揀左MiraMall地庫入面既Wired Cafe

聽講係東京好出名 主打做甜品同埋班cake

我成日以為餐廳名係Weird Cafe 

到依家寫blog我先知道係Wired Cafe

我仲以為佢係食fushion菜所以佢改名做Weird Cafe (笑)

因為係平日晏晝 所以幸運地食到比正價平少的午市套餐

午餐有五款選擇 由飯到意粉 

連Pizza都有 

套餐大概$70-$80 

比平時我係灣仔的大概貴$20

因為突然好掛住以為大學時的墨西哥飯

加上本來就想食淡口味

所以我選了第三款 [煙三文魚彩虹飯]

彩虹的意思係飯上放滿唔同顏色的配菜

估唔到實物同相片算次啊都算幾似樣

蕃茄(紅色) 煙三文魚(橙色) 粟米(黃色)
牛油果(青綠色) 火箭菜(深綠色) 照燒醬(啡色)

因為有沙律係上面所以都預咗個飯唔會太熱

所有野撈埋一齊就食得啦

本來只有沙律醬就咁食已經好好食

相反加左照燒汁我反而覺得太鹹

其實總括嚟講都算係好味道

其實跟其實套餐仲包括一盆湯

但係我食晒成個飯之後都冇送來

問咗經理之後當然就有幫我補返

忌廉栗米湯味道唔錯 不過質地比較稀

套餐仲有間野咁仲有飲品

有蜜瓜梳打 薑汁汽水 同一般咖啡奶茶

我見沙律已經係凍冰冰

咁就唔好食咁多生冷野

我揀咗熱辣辣嘅檸檬茶

其實總括來講呢一餐都幾好食

我應該下次會選擇晚餐去試吓佢哋最最出名嘅甜品

去迪士尼做好準備 扮靚靚去迪士尼 ❆ ANNA

其實係外國  一直都好流行做迪士尼嘅裝扮 而家講緊並唔係平時萬聖節 

開Party 會見到誇張性感蓬蓬裙款(驚!)

而係利用角色嘅主要色系 配搭出casual wear既感覺

隨時在網上一查 'Disney Outfit'就有好多sample

[photosource: Pinterest]

因為今次要去暑期限定嘅冰雪奇緣活動 所以今次我揀嘅就係冰雪奇緣入面嘅妹妹  - ANNA 

選擇妹妹唔選擇主角最重要嘅原因 係因為我覺得淺藍色顯黑

電影入面Anna有兩套衫 一個冬天一個夏天

我一直以來都唔鐘意綠色

所以我就係呢個熱辣辣嘅夏天

揀咗ANNA冬天嘅裝扮

:::::冬季ANNA嘅配搭:::::

❆棗紅色嘅披肩

❆黑色的上衣

❆金色皮帶

❆寶藍色半身裙

:::::菇菇當日配搭:::::

❆酒紅色上衣 - Zara

❆黑色皮帶 - 多年前爸爸嘅收藏

❆寶藍色波波點半身裙 - GU TAIWAN

❆銀色布鞋 - TOMS

希望嚟緊嘅日子我繼續可以咁有心機先做好迪士尼裝扮

- 同場加映 - 

朋友的FROZEN ELSA OUTFIT